سأل : مين خلق ربنا ؟

كان ردي : السؤال غلط
سؤالك ما ينفعش يتسئل .. عارف ليه ؟
س: هل تعتقد أن قدرات العقل البشري غير محدودة ؟
ج : قدرات العقل البشري واسعة جدا وكبيرة جدا .. لكنها محدودة جدا
محدودة بحواسها الخمسة : السمع والبصر والشم واللمس والتذوق
هنقولي الخيال مالوش حدود
أقولك : للأسف له ، العقل مبيقدرش يتخيل حاجة ميعرفهاش على الإطلاق ، ولا يقدر يتعامل مع حاجة ميعرفهاش على الإطلاق
يعني ايه ؟؟
يعني مثلا : العقل لما ييجي يفكر في حاجة ، هيفكر إن الحاجة دي يا إما تحصل بالنهار يا إما تحصل بالليل، مافيش تالت ، لأنه ميعرفش التالت ده ، ومشافش غير الليل والنهار بس
برضه يعني ايه ؟؟
يعني لما أقولك اتخيل شكل حاجة ، هتتخيلها إما كورة أو مكعب أو مربع أو مثلث .. الخ ، أو حتى شكل غير منتظم ..
تقدر تتخيل شكل غير كده ؟؟ لأ ، لأ عقلك محدود بحواسك اللي ما شافتش غير كده
وحواسك نفسها محدودة هي كمان !!
أولا : انت معندكش غير خمس حواس بس يا راجل !!
وتيجي تبص مثلا على البصر تلاقيك بتشوف الألوان بين الأحمر والبنفسجي بس ، لكن تحت الحمراء وفوق البنفسجية ؟ ولا تعرف !!
ده غير إنك مبتشوفش غير موجات الضوء بس .. ولا بتشوف موجات الكترونية ولا موجات كهرومغناطيسية أو أي حاجة تانية خلقها ربنا سبحانه وتعالى وهو وحده أعلم بيها
وقيس بقى الكلام ده على بقية الحواس !!
إذن خيالك يا عزيزي محدود للغاية بحواسك الخمسة ، وبالتالي عقلك ..
وربنا سبحانه وتعالى عارف محدودية قدرتك ، وعارف إن فيه حاجات عقلك مش عيقدر يستوعبها وحواسك مش هتستحملها .. ليه ؟ جاوب انت بقى !!
وبالتالي جعل عالم كامل من الغيبيات اللي منعرفش عنها أكتر من اللي ربنا قالهولنا .. وعشان كده مأمورين نؤمن بيها وبوجوده من غير ما نسأل أو نتخيل
( وخد بالك من نتخيل دي .. هي سبب المشكلة )
مأمورين نؤمن من غير تشبيه ولا تمثيل ولا تعطيل
طبق الكلام ده على الواقع في أي حاجة غيبية ربنا أخبرك عنها .. هتلاقي إن حواسك عمرها ما جربتها ، وبالتالي عقلك عمره ما هيقدر يستوعبها ، وعشان كده ربنا سبحانه وتعالى بيقرب الأمور الغيبية للبشر .. فتلاقي سيدنا جبريل والملائكة يتنزلون في هيئة بشرية ، ويضربلك الله تعالى أمثال قريبة من عقلك في القرآن ( يشبه بالبعوضة والعنكبوت والحمار .. لأنها أشياء تستطيعها حواسك ) وكذلك النبي صلى الله عليه وسلم ( حمر النعم - لولا هذه اللبنة ) .. الخ
نرجع بقى للسؤال الأولاني خالص :
الله سبحانه وتعالى أخبرك إنه الخالق وأنه واحد أحد وأنه لم يلد ولم يولد ولم يكن له كفوا أحد .. ها ؟
ده معناه نؤمن بيها من غير أن يكون له سبحانه مثيل أو شبيه
التمثيل والتشبيه ده شغل العقل اللي بيتدخل في حاجة ميقدرش عليها أصلا
هي دي المشكلة : إنه ميقدرش عليها وبيحاول يدخل نفسه فيها
يا صديقي العزيز .. في الختام عايز أقولك كلمة د. مصطفى محمود الرائعة :
( كيف تجعل الله مخلوقا وأنت تسميه الخالق ؟